Roobab xalay ka da’ay magaalada Qardho ee gobolka Karkaar ayaa sababay daadad xooggan oo ku soo rogmaday gudaha Magaalada.
Daadkan oo waxyeelo u geystay guryo ay degnayeen dad rayid ah, ayaa keenay barakac ballaaran oo saakay laga dareemayo dhanka galbeed ee magaalada Qardho.
Goobjooge ku sugan Qardho oo aan xiriir la sameynay ayaa inoo sheegay, in inta badan magaalada ay buux dhaafiyeen biyo, wallow ilaa iyo iminka aan la ogayn khasaare nafeed oo ka dhashay daadadkaasi ku soo rogmaday magaalada.
Maamulka Puntaland ayaanan ilaa iyo iminka ka hadlin daadka ku soo rogmaday xaafadaha galbeed ee magaalada Qardho, mana jirto gargaar la taaban karo oo uu maamulku la gaaray dadka guryahooda ka barakacay.