Shir ballaaran oo lagu qabtay magaalada Gaalkacyo ayaa maanta lagu dhexdhexaadiyey labo beelood oo maalmahii u dambeeyay dilal iyo aanooyin qabiil uga dhex dhaceen gudaha magaalada iyo Bariga gobolka Mudug. Shirkan waxaa si wadajir ah u soo qabanqaabiyey maamulada Puntland iyo Galmudug maadaama beelahaasi ay ku kala nool yihiin labada dhinac ee maamulka kala qaybiya Gaalkacyo.
Munaasabadda waxaa ka qayb galay nabadoonada labada beelood, waxgarad, culimo iyo khubaro ku xeel dheer dejinta colaadaha kuwaas oo loo xilsaaray in xal waara laga gaaro xiisadaha soo noqnoqday. Ujeedadu waxay ahayd sidii loo joojin lahaa dilalka iyo colaadaha dhaawaca ku haya nabadda gobolka.
Guddoomiyaha gobolka Mudug Faysal Sheekh Cali Jifojabsade oo khudbad ka jeediyey shirka ayaa ku dhawaaqay go’aan adag oo labada maamul ay si wadajir ah u gaareen. Waxa uu sheegay in qof kasta oo dila qof lagu ganaaxi doono lacag dhan $30,000 oo dollar halka qofkii isku day dil geysta laga qaadi doono $15,000 oo dollar. Lacagahan waxaa leh magaalada waxaana ay ka madax bannaan yihiin xaqa qoysaska dhibbanayaasha.
Gobolka Mudug ayaa saddexdii sano ee la soo dhaafay la daalaa dhacayay dagaalo beeleedyo ka dhacay Bariga iyo Galbeedka halka gudaha magaalada Gaalkacyo ay ka jireen dilal is-daba joog ah oo aanooyin qabiil salka ku hayay. Colaadahaas ayaa saameyn weyn ku yeeshay nabadda iyo xasilloonida bulshada gobolka.
Maamulada Puntland iyo Galmudug ayaa ku baaqay in bulshada labada dhinac ay ka qayb qaataan hirgelinta go’aamada la gaaray si loo soo afjaro colaadaha soo noqnoqda. Nabadoonada iyo waxgaradka ayaa ballan qaaday inay door ka qaadan doonaan sidii heshiiskan loo dhaqan gelin lahaa loona xaqiijin lahaa nabad waarta oo ka hana qaada gobolka Mudug.
