Weeraryahanka reer Poland Robert Lewandowski ayaa lagu soo warramayaa in uu ciyaari doono xilli-ciyaareedkiisa ugu dambeeya ee Barcelona sanadkan.
Sida uu sheegay Diario Sport, maamulka Barca ayaa go’aansaday inaysan cusbooneysiin qandaraaskiisa oo dhacaya xagaaga 2026, inkastoo uu heysto ikhtiyaar sanad dheeraad ah. Naadigu kama faa’iideysan doono fursaddaas, iyadoo arrintan loo arko qeyb ka mid ah istiraatiijiyadda mustaqbalka fog.
Barcelona ayaa durba billowday inay baarto bedelladiisa, iyadoo tixgelinaysa saxiixyo cusub iyo sidoo kale xiddigaha gudaha kooxda sida Lamine Yamal iyo Ferran Torres.
Qandaraaska Lewandowski waxaa ku jiray shuruud ah in haddii uu ka qeyb galo ugu yaraan 55% ciyaaraha (ugu yaraan 45 daqiiqo kulan walba), uu si toos ah u sii joogayo xilli-ciyaareedkan. Shuruuddaas ayuu buuxiyey, sidaas darteed joogitaankiisa sanadkan ayaa la xaqiijiyey.
Inkasta oo uu gaaray 36 jir, Lewandowski weli waa mid saameyn ku leh kooxda, isagoo dhaliyay in ka badan 40 gool dhammaan tartamada xilli-ciyaareedkii hore. Tan iyo markii uu yimid Camp Nou, wuxuu dhaliyay 101 gool 149 kulan gudahood.
Si kastaba ha ahaatee, Barcelona ayaa u muuqata inay diyaar u tahay jiil cusub, taasoo ka dhigaysa in xilli-ciyaareedkan uu noqon doono macsalaameynta Lewandowski ee Blaugrana.
